Ha'u La Estuda Literatura Iha Universidade

CAILØR MEDIA*****

Ema ida, ha'u lakonese, mensagen ba ha'u. Bele hakerek ha'u nia istória.

Maske ha'u la'ós ema importante, ha'u la'ós jornalista ho kartaun. Se nia hasoru ha'u ho fizikamente, iha nia matan, ha'u hanesan ema R&B nomós musisi Rapper. Tanba hatais jeito nemós arte ida, arte la'ós pinta de'it iha kanvas ou barede. Haré didiak iha sosial media, ema hotu tau nia foto hakarak nia kolega sira hare, roupa saida mak nia hatais, balun faan tan sasan hanesan merkadu online. Ne'e realidade.

Nia husu, oinsa ha'u bele hakerek istória, ha'u nia kolega sira nia istória. Istória sira ne'e hanesan la mai hosi prosesu hanoin, ha'u fakar de'it hanesan be sulin buka rai tetuk ba animal atu hemu.

Ha'u bele hakerek to'o iha ne'ebé sempre mai hosi hau nia esperensia pesoal. Ha'u la le teoria hakerek, la aprende hakerek iha universidade, maibé ha'u sempre le livru iha tempu luan. Memoria barak ha'u haluha tanba tempu muda lalais, maibé iha novela ne'e ha'u hare buat ida, hare karakter ida ne'ebé ha'u hare iha ha'u nia pasadu.

Makse ema ne'ebé ha'u le iha novela bele iha Fransa, Alemania, Vietnam, Brazil. Nia istória moris atu hanesan ho ema ne'ebé ha'u hatene, ha'u hasoru iha pasadu. Ha'u komesa uza ha'u nia imajinasaun atu kria plot, konflitu, karakter, naran no buat barak. O hatene tanba sa ha'u gosta hakerek.

Tanba ha'u nia lia fuan bele lori ha'u semo as liu lalehan, lori hau tama ba moris ne'ebé ha'u nunka hare, hasoru ema sira uniku. Tanba ne'e ha'u hakerek, iha nakukun nia laran, se iha nakukun ita la hare. Ne'e signifika katak, ita hare moris ne'e preparadu ona, forma lina iha dalan hein liurai. Ita tama ba nakukun ita tauk, tanba iha ne'eba se iha nakukun ita la hare.

Tempu uluk, ema hakerek atu posting iha media (cetak) ou nia blog. Nia se ba hateten nia kolega atu ba internet le nia istória. Sosial media troka buat barak. Ohin loron, o bele hakerek dehan. Ha'u hamlaha, ha'u iha airoportu, ha'u atu ba fatin ne'e, ha'u senti baruk oituan, imi mak goja ona moris. Hatene nia reaksi hosi nia kolega, komen mesak oioin de'it.

Tanba ita gosta komen ba buat ida la importante sai interestante. Ba ha'u pesoal, ema gosta ka la gosta, komen la komen ne'e laiha impaktu bot ba ha'u nia hanoin. Ha'u hakerek ona nakukun ne'ebé ema tauk tama ba laran, ha'u nia istória lori ha'u semo ba lalehan. Iha minutu ida ne'e nia laran, mundu le ona ha'u nia istória la'ós sentimentu.

Depois liu tiha loron balun, ema ida, ha'u lakonese, mensagen ba ha'u. Bele hakerek ha'u nia istória. Maske ha'u la'ós ema importante, ha'u la'ós jornalista ho kartaun. Se nia hasoru ha'u ho fizikamente, iha nia matan, ha'u hanesan ema R&B nomós musisi Rapper.

ROBIN