Tama Asrama LOSPALOS

CAILØR MEDIA

Esperensia Tama ba Asrama Dom Bosco Lospalos

---

Iha loron 2 fulan Novembro tinan 2009.

Dader de'it kontenti la halimar, tamba rona dehan atu ba hela iha ASRAMA. Ha'u sente ha'u iha tiha ona lalehan tamba de'it ho kontenti. La sente tempo mos to'o dau-daun atu ba hela iha ASRAMA.

Iha loron sexta dader, ha'u nia Prima MADRE telefone ba ha'u nia apá-ki'ik dehan:

"Fó hatene hela ba Basílio aban sira bele mai ona".

Ami halo tuir duni. Wainhira ami to'o iha Lospalos, ami ba hela ho maun sira lai. Loron tu'ir mai, loron Domingo. Iha loron ne'e kedas mak ami ba komunidade Padre sira nian. Wainhira ami to’o iha ne’ebá, Padre Director Comunidade nian simu ami ho kontenti nune’e mos Pre-Novisiu sira. Hafoin liu de'it minuto lima hanesan ne'e, Padre dehan ba ami nune'e;

"Basilio nia alin ho nia Mama bele fila ona, ho Madre."

Ha'u rona lian ne'e de’it, senti hanesan la hakmatek ona tamba ha’u sei hela mesak no husik alin no familia tomak. Hafoin, ha'u nia mama hakuak no rei ha'u nia rentoos hodi dehan ba ha'u;

"Basi.. Agora o hela ona ho Padre sira la hanesan Basi hela ho ha'u. Ne'e bé, tenke halo tu'ir buat ne'ebé sira haruka".

Koalia hotu tiha, mama haruka ha'u atu rei ha'u nia alin hodi nune'e sira fila ona.

Laran ne'e kmaan hela maibe ha'u sente todan mos. Mama ho alin sira hakat ain lao dau-daun atu lakon husi ha'u nia hare’e. Laran ne’e aumenta tan ninia todan. Pre-Novicio ida mai lori ha'u atu ba andar leten hodi hatudu ha'u nia toba fatin, hafoin nia lori ha'u atu ba hasoru ha'u nia belun Orfonatu sira. Hafoin nia aprezenta ha’u ba kolega sira, nia haruka ha'u ba tuur. Ha'u ba liu kedas tuur iha kotuk no hakruuk tuun de’it ba rai ho matan-been suli habokon ha'u nia hasan hanesan mota tun. Ha’u nia tanis de’it mak hahu lian ona "hum… hum… hum… hum…".

Regulamentu ASRAMA ninian, ema hotu-hotu tenke koalia Tetum se la'e Português. Sé mak koalia ninia lian Materna se fó sansaun. Sansaun ne’e mak fase sintina no fila rai!

Como ita ema foho be la hatene Tetum, entaun iha ASRAMA ita sai hanesan ema MONOK ida ne'ebé la hatene koalia. Tempo ne'ebé di'ak ba ha'u atu dadalia uituan mak tempo ESKOLA ninian. Maibé, fila husi eskola ba fali ASRAMA, senti triste liu tamba ba iha ASRAMA ha’u hanesan ema MONOK. Afinal, ha'u foin iha ASRAMA loron 2 de'it.

Iha meiu-dia ida, ami han to'o bikan mamuk maibe nen ema ida koalia to'o ami han hotu tamba seidauk toman malu. Ho preokupasaun ne'e, ha'u nia belun ami hamutuk meja ida, sira foti desizaun katak tempo han ema hotu-hotu koalia, sé mak la koalia nia mak fase bikan. Kada meja ida hamutuk ema nain ualu mak iha meja ida.

Oras mos lao dau-daun, sente to'o ona tempo estuda ninian. Iha sala estuda, ha'u preokupa liu ba ha'u nia aan. “Orsida tempo han kalan ha'u atu koalia saida?"

La sente oras iha didin hatudu tuku 19:30 no sinu lian ona signifika katak atu ba han. La'o dau-daun ba REFEITORIO atu han, maibé, laran ne'e lakohi tamba orsida atu koalia saida? Obriga aan tama ba refetório hahú reza. Suru etu ba bikan no fihir dau-daun ba belun sira ne'ebé koalia namanas hela. Balun konta istória no balun fali goja malu maibe ha'u nafatin ema MONOK, la koalia to'o ami han hotu. Sira dehan ba ha'u nune'e;

"Desizaun ita hatuun tiha ona katak sé mak la koalia nia mak fase bikan ne'e hotu".

Ha'u mos nonok fase de'it. Ha'u hanesan sira nia atan no sira hanesan Liurai Oan ne'ebé han hotu soe hela bikan iha fatin no ha'u mak fase.

Hanesan ne'e to'o semana rua. Ha'u baruk atu fase sira nia bikan. Nune’e ha’u esforsu aan koalia kedas no sei koalia até ohin.

"Tetum ema koalia ha'u kompriende maibe ha'u atu koalia mak susar."

NB : Istória ne'e la'os fiksaun. Ne'e Ha'u nia esperiensia wainhira Ha'u fou-foun tama ba Asrama Dom Bosco Lospalos.

Ba maluk sira iha sujestaun ruma kona ba ha'u nia hakerek ne'e bele fo komentariu ba.

Ha'u husu ita bo'ot sira nia sujestaun atu ha'u hadia di'ak liu tan ha'u nia hakerek.

Obrigado.

Profil Basilio:

Ha'u nia naran kompletu Basílio Miranda Monteiro. Husi municio Lautém, Postu Administrativu Lautém. Ha'u nia passa tempo mak Passeio no le'e istória komik/rona istória komik. Ha'u hakarak hakerek atu bele aprende no ha'u iha mehi ida atu hakerek livru ba ha'u nia istória rasik.

---