Otopsy

Otopsy CAILØR MEDIA

---

Tinan hira liu ba, hau hasoru mane metan ho fuk naruk dulas hanesan Bob Marley. Hau mai iha festa tarde oituan. Nia hamrik besik didin, halibur hamutuk ho timoroan balun. Nia hamnasa, nia matan ho jeitu dala ida dala ida seriu los. Selos mak mane ne'e? Hau lahatene. Tua tintu nia manas halo ami besik malu. Hau sedauk loke hau nia ibun atu komesa komunikasaun hanesan hau halo ba ema seluk. Kalan ne'eba nia "atmosfer" oin seluk oituan, lahanesan fulan kotuk. Maske tintu kopu rua hanesan "kalis" hau halo mamuk tena. Saida mak ladiak iha kalan ne'eba? Kolega seluk ne'ebe konese ona nia sira koalia mamar, hanesan hasoru eis namorada iha tenda laran ho vestidu mean matak. "Robin. Nia mos ema Lospalos". Dehan kolega ida mai hau. Hau hamnasa kaer nia liaman hanesan ema halo transaksi fa'an droga. "Lospalos parte ne'ebe?" Hau husu ho perguntas i'is tintu mean. "Tutuala" Hanesan tradisaun ema Lospalos, hasoru malu iha ema barak nia let ami komesa koalia kedas lian Fataluku. Ami mos konese malu lalais keda hanesan telefone 4G. Hau foin hatene nia artista. Sim. Hau hare video ida maibe hau lahatene katak mane ida kanta ne'e mak nia. Hau nia kulpa, deskulpa. Ami mos hasoru malu fali iha fatin hanesan maibe tempu ho oras mak lahanesan. Hanesan hau nia promete wainhira nia telefone hau naton hau se iha bibleoteka nasional katak hau atu intervista nia ho perguntas kona ba nia, nudar artista gerasaun foun Timor Leste. Hau ho alin ida azuda hau ho audio, nia mak Ule Viana. Nia video hau posting iha youtube ema barak mak hare, rona nia istoria kona ba nia muzika ho liriku kritika ba governu Timor Leste. Nia istoria mai husi Tutuala, halimar viola husi nia maun fila husi misaun Fuiloru Lospalos. Mai iha Dili, hasoru nia senior Banda naran bot iha Timor, Galaxy. Nia fens ohin loron laos rona deit nia muzika husi telefone, hare nia lao iha dalan hanesan ema rastamania, maibe iha istoria ida ne'ebe laos ema hotu hatene. Kona ba mane metan ne'e ho naran Otopsy.

---