Hau Nia Kulit Iha Ne’ebé?

Djoe Lari Mata
Aug 30, 2016
6 min read

Foto ilustrasi: in.pinterest.com

CAILØR MEDIA

"Husu ba ita nia a’an, saida mak Ita tenke fo ba ita nia nasaun, LAOS husu saida mak nasaun atu halo ba Ita.

Presidente Lincoln.

Moris iha mundu, ita ema ida-idak iha mehi atu duni tuir, kaer no sai nain, maske to'o ikus ita balun hetan no balun nafatin mehi de’it. Husi mehi sira nee rasik, nudar naha iha kba'as, dudu ita neon esforsu a'an atu hatudu sai realidade.

Ha'u mos hanesan ema seluk nebe iha mehi maibe ha'u tenke hatene a'an, ha'u laos ema riku. Lae ! Ha'u ema kiak. Husi familia kiak nebe hori nanis kiak duni no

tamba kondisaun ekonomia ne’ebé fraku no kbi'it rabat rai. Ho otas ne’ebé sei matak, nune’e ba ha’u laiha liafuan hakruuk ba realidade.

Tan ne’e ha'u tenke duni mehi liu husi dalan edukasaun. Ho hanoin katak so liuhusi Edukasaun mak bele liberta ha'u a'an nune'e ha'u tenke badinas aproveita oportunidade bolsu estudu tantu husi governu, doasaun ka NGO sira. Ha'u sei hanoin kona belun ida nia hateten bainhira ha'u sei tuur iha banku SMA klase 2, katak, hakarak susesu laos tula liman ba hasan hodi kaer mehi, maibe tenke haka'as a'an hiit ain lao hasoru. Liafuan ne’e sai ona bukae naton ba ha'u atu hakat.

Hafoin akaba SMA, tamba mehi kili nafatin no nudar tusan ida, katak, so ha'u deit mak bele halo no muda ha'u nia ISTORIA MORIS. No ha'u, nia, ita hotu hatene ho fuan momos katak moris ne’e nudar KOMPETISAUN. Nune'e, ha'u hanesan mos maluk sira, hiit map kinur, lao kosar sulin haluha kolen, hatudu oin iha fati-fatin, hakribit moe hodi esmola ba estadu, doadores ka NGO's liuhusi dalan kompete atu hetan netik bolsa estudu. Rezultadu ikus, ha'u liu duni bolsu husi governu. Ha’u liu selesaun dokumentus, ezame hakerek, intervista no ikus mai konsege tutan liras semo ba ema nia rai atu estuda.

Ha'u fiar, maske mehi seidauk 100% hetan ona, maibe pelo menus 15% mehi iha liman laran ona.

Ohin ha'u sai laorai ona. Hamutuk ho maluk hotu ami tula liman ba malu hodi hasoru moris foun, iha fatin foun no ho ambiente foun mos (eskola no komunidade). Nudar laorai ba dahuluk, saida mak ita sente wainhira hasoru buat ne’e hotu ?

Karik la sala, ita sei hasoru laloran bo'ot ne’ebe iha mak kultura be la hanesan nune'e sei hamosu moras ida be babain ema hanaran homesickness ka SAUDADES UMA".

Saudades uma ne’e liu-liu konaba ita nia rain, familia, inan-aman, hahán no lala’ok moris iha sosiedade. Tamba kada ema ida nia kbi'it atu adapta a'an ho situasaun foun presija tempu nebe relativu la hanesan. Klaru ke moras ne’e afeita tebes ba ha'u no ami nia estudu, nomos ba ami a'an rasik. Maibe moras née sei lakon neneik ba neneik tuir tempu nia lao.

Lalaok sira nee mak mosu mai ha'u.

Wainhira foin loron rua hela do'ok husi familia, ha'u sente rai nakukun tebes no iha neba hanesan moru boot ida mak teri netik antes ha’u tenki hakat liu hodi hakoak ha'u nia mehi. Ha'u sei hanoin hetan iha tempu ha'u tu'ur muron mesak iha ai katapa ida nia okos, dada LA klean tebes hodi huu lakon ba kalohan azul, monok iha lian barulhu laran no ho lian todan hatan ba belun ne’ebé hakbesik. Nia hase’e no ami hahu dada lia.

"Hoi,... Nusa mak o hakmesak a'an los nee? "

Hanesan lia la kona, nia husu tan. "Be O hanoin los saida gau? Bro... Santai deit. Moris nee ita enjoy tiha deit waliiii... hahahaaaa....."

"Santai.... Santai. O nia ulun-fatuk ne’e mak santai. O be di’ak. O atu hanoin tan sé? Paliiii...ing doben. Oin hanesan o ne atu hanoin inan-aman ka? Sa tan familia? Tfuiikkk... karik o mehi mos la hanoin kona."

"Bro... hanoin be hanoin. Be ita atu halo tan saida, hah? Ne’e konsekuensia husi ita nia hakarak rasik. Kan ... Laos took ema ruma mak obriga ga kili ita mak mai iha ne’e toooo....?" Nia koko motiva ha'u atu iha kbi'it hasoru realidade.

No ha'u hatan:

"Los. Maibe, problema mak it-rua la hanesan. O hatene ka lae? Wainhira ita mai ne’e, ha'u nia oan foin mak fulan haat. Haa...aa....a, ne'e mak ha'u hanoin hela sira. Sé mak sei tau matan ba sira nia moris loro-loron wainhira ha'u iha ne’e? Tane liman no tara a'an ba inan aman mos ema sei dehan saida? O sorti be seidauk hola-feto."

Hafoin dada iis naruk ha'u hatutan tan:

"Buat sira ne mak halo ha'u hanoin hela ne’e. Se lae, nusa tenke hanoin barak?" Hau konta hikas..

"Ouuuu... Nune'e eihhh... Entaun ita lao pasiar tiha. Hakarak ka lae? Keta hetan panorama foun hodi hamenus tiha o nia hanoin sira ne’e

karik?"

"Aisembai.... Sé mak hatene? Maibe..... Ok…! Ita lao to’ok mak hare’e."

Nune'e ami mos hakat ain lao hodi buka netik anin foun atu hakma'an a'an husi hanoin tomak ne'ebé halo barulhu hela ulun-fatuk.

Iha ne’ebá, iskola mos hahú lao hafoin semana ida ami hala’o rejistrasaun administrasi. Nune'e iha iskola, hakarak ka lakohi tenke haka'as a'an buka hatene lisaun hotu ne'ebé simu. Se lae, sei fila ho liman mamuk.

Husi lalaok hanesan ne’e, karik, ha'u sente esforsu be ha'u hatudu ne’e maka'as liu fali NICK VUJICIC nebe haka'as a'an susesu iha moris maske liman no ain laiha.

Loron kalan ba ha'u hanesan motor halai iha dalan los nune'e mina mohu atu aprende no kapasita a'an. So Sabadu-Domingu mak redus oituan hodi bele hakmatek halibur netik a'an ba lalaok estuda ne’ebé extra sibuk ne’e.

Todan tomak mesak hiit, monu hamrik no monu tan, hamrik hikas. La mosu anju ka satanas mak laran luak netik hodi lolo liman wainhira monu haklenak. Maibe ha'u no so ha'u mesak mak hasoru. Nune'e, so mosu mak dikur EGOISTA ne’ebé kroat tan deit husi loron ba loron, maske husi fatin ketak subsidiu moris nian husi Governu nunka falta no sulin nafatin tuir ATM ho tempu be nunka muda.

Nafatin nune'e no nune'e nafatin, la sente tinan haat liu dadauk ona. Naha hotu sente kaman ona. Ho oin hamnasa luan, hafoin gradua, sertifikadu iha liman ona no sura loron deit atu fila hikas. No ikus, ha'u fila duni.

Ha'u fila no la hein tan to'o tempu silu batar ba dala rua. Ha'u mos serbisu ona. Derepente, hahu mosu hanoin ida iha klamar ho fiar a'an ne’ebé semo sa'e to'o lalehan ne’ebá no dikur hahu moris buras tan deit. Ha'u be uluk seidauk ba estuda iha liur la hanesan ona ha'u ida be agora ne’e.

Uluk:

Ransu ema arbiru

Koalia sukat ibun

Haraik a'an

Respeitozu

Hanesan ema foho nebe hakfodak ba ema seluk wainhira hetan susar.

Maibe ohin:

Arogansia

Sente a'an matenek mesak

Hili-hili ema se mak atu ransu no lae

Tempu hasoru malu ho ema uma sori-sorin laiha los ona.

Sa tan, iha servisu fatin ema fo oportunidade ha’u sai sefi no hetan tan kareta estadu nune'e ha'u so liga mak ema boot, ema sira be iha level. Maibe ema ki'ik sira? Sira be uluk ha'u nia belun? Ohin loron, sira ne’e ba ha’u la level ona, sa tan atu konhese. Pokoknya, uluk ho agora, ha'u muda a'an 180°. Yiiiiihhhaaaaaaaaa........

Iha servisu fatin, tanba ha’u hanoin ha'u akaba estudu iha rai liur, nune’e ha’u senti la hanesan ho belun seluk. Husi ha'u...., ha'u...., no mesak ha'u. Belun seluk hare’e mos la hetan. Sa tan wainhira koalia konaba matenek, ha’u senti so ha'u deit mak iha sira nia leten. Ha'u hahu ejiji matan mean ba ha'u nia DIREITU. Ha'u modifika ona hanesan motor Yamaha A100 nebe uja makina (mesin) Harley Davidson. Nune'e ha’u hanoin ba ha'u nia kapasidade ne’e halo diferente tebes entre ami, nudar rai no lalehan.

Wainhira hau fiar los deit ba hau a'an (ego), ikus halo ha'u sai matan klo'ot maske hau laos mistu xineza. Nune'e ha'u hatene de’it mak hau no belun sira ne’ebé iha hanesan tiha laiha. Ha'u luta mate a'an deit ba ha'u nia direitu maibe hanoin kona ba dever, ha'u rai subar tiha husi neon nia hateke. Buat ha'u deit ne’eee....!

kus, saida mak mosu mai hau?

Ha'u sai ona hanesan alien iha sira le'et ka hanesan besi-asu parte tasi-mane no belun sira parte tasi-feto. Ema barak hahu hadook a'an tan la simpatia ho ha'u nia hahalok maibe ha'u LA LIGA RAI. Maibe, teki-teki hanesan rama oan Robin Hood nian be sona borus ha'u neon wainhira rona tutan manu Lakateu lian kokorek mai ha'u katak:

- Iha ema ne’ebé hatene momós sé mak hau, sira sei hananu "nia AMNESIA eh ALZHEIMER todan. nune'e lakon tempu deit se ita fo hanoin

ba nia."

- Iha ema seluk mos ho fiar a'an hateten: "Nia karik ispelu iha uma laiha ida karik?"

-No iha mos ema balun koalia:

"Foin mak hetan naroman lampu-neon hahu haluha ona lilin nia lakan. Foin kokir netik oituan mos tebe liku rai ona, sa tan hanesan luta nain sira be to’o lakon nia moris maibe sira klamar la ejiji buat ruma. Se nia mak hanesan luta nain sira karik, kala rai ida ne’e nia atu sai nain mesak deit. Dasar maupagador! Nia hanoin osan estudu to’o hetan sertifikadu ne’e familia nian karik?"

Maibe, husi lian ne’e hotu, ba ha'u fuan fatuk los ona. Tama tilun sorin sai tilun sorin hanesan anin. Ha'u la koko atu horon hodi fo kbi'it nune’e bele reflekta a'an atu iha balansu ba hau nia hakarak hodi ejiji. Maibe ha'u husik liu deit atu nia lao ba ne’ebé deit tuir nia hakarak. Tamba, ba ha'u rasik, susar tebes atu muda a'an.

Dili, 20.08.16.